Mi nomber ta Armand Hessels y m'a nace na Aruba dia 6 di december 1953. Desde maart 2005 mi ta casa cu Micheline Bury. Mi tin dos yiu for di un matrimonio anterior (Erik y Karen) . Mi ta biba na un dushi lugar, esta Turibana 22, Noord, ARUBA.

Mescos cu hopi hende, pa hopi tempo mi no tawata masha interesa den asunto di comunidad manera ‘politica’. Di un momento pa otro a bin cambio den esey na momento cu mi a wordu confronta cu corupshon, tempo cu mi tawata purba introduci caminda pa bicicleta na Aruba: mester a duna un ministro placa pa su firma pa haci caminda pa bicicleta posibel. Esey m’a nenga rotundamente.

Despues di esaki a sigui un periodo den cual m’a profundisa mas den politica na Aruba. A describi e resultado di esaki den e buki ‘Bon gobernashon & e realidad politico’. Añanan despues a sigui un bista mas completodi politica na Aruba den e buki ’25 jaar Status Aparte. Een politiek paradijs’. Tur dos ta describi e papel di politica pa cu salud di comunidad.

Ademas m’a publica e buki ‘Embaraso y parto den harmonia’. Hopi mas un buki na mi gusto. Pero...skirbi tipo di buki asina banda di trabou ‘normal’ y otro actividad ta un peso mucho grandi. Dios gracias a bin cambio den esey.

UN BIDA NOBO!

Dia 14 di februari ultimo pa 10 ‘or di mainta, a pasa locual varios persona, menos mi mes, semper a teme: mi aorta a ‘sker’. Na december 1999 a constata cu mi tawatin un aneurisma den e parti di aorta cu ta sali for di curazon. Un eventual operashon tawata mucho riesgoso. Pa evita problema, mi lo mester hiba un bida hopi trankil pa resto di mi bida y haci control anual di e aneurisma. Di biaha mi mester a para mi trabou como docente di deporte. Mi trabou nobo como consehero di alumno tawata (fisicamente) hopi mas trankil.

Un aneurisma ta un lugar den ader cu a hancha. Asina e ta mas delica cu chens grandi di sker.

Ora m’a dal abou na scol riba dia di San Valentino, ningun momento m’a pensa cu ta pa motibo di e aneurisma. Ta solamente despues cu un scan na hospital a detecta cu en berdad ta trata di e problema di aneurisma, m’a pensa: “OK, esey ta nifica fin di mi bida”. Ya for di aña 2000 mi tawata sa cu riba isla chikito manera Aruba un problema di aneurisma ta nifica sin mas cu lo muri den corto tempo pasobra no por para e deramen di sanger interno. Solamente na pais grandi cu si por permiti nan mes un hospital specialisa pa haci operashon di curazon habri, tin chens pa sobrebibi.

Pesey tambe mi cardiologo cu tur su razon no tawata nada optimista di mi posibilidadnan pa sobrebibi. Asina mes el a haci tur su esfuerso, den estrecho coperashon cu AZV, pa regla mi transporte pa Colombia cu Air Ambulance. Al fin y al cabo a opera’mi 15 ora despues cu e problema a presenta su mes. Tawata un operashon hopi complica na unda a corta e pida aorta cu tawata daña y a remplac’e pa un pida artificial na unda a conecta varios arteria chikito pa curazon mes. Ademas a remplasa e valvula for di curazon pa aorta como cu esun original tambe a daña.  

Segun e cardiologonan cu a opera’mi, e chens pa sobrebibi e operashon ey tawata apenas 5%. Pero esey tawata hopi halto caba, tumando na cuenta cu normalmente no sa sobrebibi mes e trayectorio di 15 ora prome cu mi operashon, e chens ey tawata menos di 1 den un miyon. No ta por nada cu tanto mi cardiologo na Aruba como esunnan na Colombia a expresa varios biaha cu m’a sobrebibi pa motibo di un milager: “Señor Armand, esto fue un milagro!”.

Na mesun manera nan a keda hopi impreshona di mi recuperashon despues di operashon. E prome 5 dianan despues di operashon m’a pasa den Intensive Care. Mi tawata masha debil mes. Pero ya caba despues di 2 siman mi tawata haci ehercicio durante 1 ora pa dia: core bicicleta (hometrainer) y ehercicio hopi simpel pero efectivo. Exactamente 3 siman despues di operashon mi tawata bek na Aruba, hopi debil, pero masha contento y hopi agradeci na tur esnan cu a copera pa mi keda na bida. Ta trata di dirigente y personal di Colegio Arubano cu a duna prome auxilio adecua y a percura pa ambulance yega den un tempo record; personal di ambulancia cu a trata’mi na un manera hopi profesional mes y a percura pa stabilisa’mi; personal di hospital cu na mesun manera a haci tur lo posibel pa stabilisa mi situashon y duna’mi trankilidad; mi cardiologo cu a tuma e decishon pa manda’mi di biaha pa Colombia cu Air Ambulance; AZV cu a traha hopi duro mes pa logra trece e Air Ambulance lo mas pronto posibel y a pone e contacto cu e specialista renombra cu a opera’mi; e personal di Air Ambulance (di Bogota) y e personal di e hospital na Bucaramanga. Mi ta hopi agradeci tambe na mi pais Aruba, pasobra pa mas chikito cu e ta, el a crea un sistema di salubridad publico cu ta traha duro pa brinda un bon servicio. Y un danki special ta bay na mi casa Micheline, pasobra den tur e consternashon el a mantene su cabes frieuw y a tuma cierto iniciativa cu mi ta convenci cu, hunto cu tur otro (!), a percura cu mi por conta e historia aki.

Na momento di a yega hospital na unda personal di ambulance a puntra Micheline kico por ta motibo di mi situashon, el a menciona cu mi ta paciente di aneurisma y pesey mi ta bou di control di cardiologo. Ora el a bisa esey, e personal a mira otro y a keda keto. Claro, nan sa masha bon kico esey kier men: caso perdi. Ora e cardiologo a yega poco despues y a mira’mi, su prome reacshon na Micheline tawata cu pa tur seguridad e mester saca un scan, pero cu e ta duda cu mi lo alcansa e camber di scan na bida (en bista cu mi color ya caba a bira gris, mi tawata masha frieuw mes y mi preshon di sanger tawata casi ausente). Na e moment ey Micheline a pensa bon na ken e por acudi pa yuda’mi keda na bida. No tawatin sentido pa duda dje cardiologo pasobra nos mes tawata sa caba cu no lo tin scapatorio den e caso aki. Pesey tambe el a pensa riba ‘intervenshon di e dimension spiritual’:  el a corda riba locual un terapista spiritual a yega di cont’e, esta  cu cada persona na mundo tin un ‘compañante spiritual’ cu ta cuid’e. 

Na prome instancia el a pensa riba su mama  cu a muri algun aña prome. Pero el a sinti di biaha cu esey no tawata adecua. Di biaha el a pensa riba un bon amigo cu a muri prome cu su mama, pero el a sinti mesun efecto. Y despues su pensamentonan a bay riba mi tata cu a muri mas cu 10 aña pasa. Y manera cu su pensamentonan a bay riba dje, el a mira mi tata cla cla: cu su cara serio di semper y 

cu su paña di costumber  bisti. Y el a puntr’e: “Cor, Bo por pidi permiso pa yuda Armand keda na mundo”? Y sin contesta, mi tata a enfoca riba mi y a extende su braza- y mannan como sifuera e kier evita cu mi lo pasa pa su mundo. Y asina Micheline a mir’e durante oranan largo. Te ora cu por fin m’a drenta camber di operashon na Bucaramanga. E  momento ey (3’or di  marduga) el a bay ‘cas’ pa drumi un rato como cu mi operashon lo dura hopi ora. Ora el a bolbe bek, el a wordu informa cu e operashon (cu un durashon di  9 ora!) tawata exitoso. Di  biaha el a ‘yama’ mi tata atrobe y cu mesun cara serio el a ‘aparece’. Ta solamente ora cu Micheline a expresa su alegria y gratitud y a acerc’e pa dun’e un sunchi, el a ‘smile’ y poco poco a desparce.

Claro cu ora Micheline a conta’mi esaki algun dia despues, ora m’a recupera un tiki forsa atrobe, mi tawata hopi emoshona. Claro tambe cu mi a tuma su testimonio na serio, pasobra no ta algo cu un persona simpelmente ta inventa na un momento significativo asina. Micheline ta un persona sumamente serio, pues mi no tawatin ningun motibo pa desconfia di su palabranan. Ademas tur medico envolvi a keda declara cu tawata simpelmente increibel cu m’a sobrebibi. Y tanto pa Micheline y mi mes tawata hopi straño cu poco despues cu el a ‘busca contacto’ cu mi tata na Aruba, mi color a cuminsa normalisa un tiki, m’a cuminsa soda menos y m’a bira mas trankil. Micheline tambe a sinti un trankilidad baha riba dje y ningun momento e tawata teme mas cu mi lo muri. E tawata sinti cu mi tata tawata proteha’mi!

Mientrastanto mi ta sigui recupera, anke mi ta sinti cu mi no lo yega e mesun nivel ‘di antes’ mas. Regularmente mi ta sinti mareo of mira dobel mientras cu mi ta cansa hopi lihe y mi memoria sa faya. Mi ta scucha e valvula nobo cla cla y mi mester tuma cierto medicina importante pa resto di mi bida. Pesey tambe mi mester biba mas trankil locual tur mi amigo- y conocirnan ta repeti tur dia pa mi haci di berdad. Pero lo mas importante ta: mi ta na bida ainda y esey ta algo masha grandi mes. Awor e reto ta pa purba di cumpli locual por ta un mishon importante den mi bida.

Armand Hessels - 3 September 2013