comunidad

Na mayoria di pais hende ta biba den comunidad cu otro. Mas hende biba hunto, mas palabrashon nan mester haci pa cos anda suave. Den curso di siglo e aumento grandi den poblashon y complehidad di e comunidadnan a hiba hende na delega maneho di nan comunidad den man di un grupo chikito di gobernante y representante. Asina politica a lanta hunto cu democracia parlamentario.

Pa hopi hende, politica tin un sabor amargo. Pasobra di biaha ta identific’e cu conflicto, pelea, nepotismo, corupshon y propio interes. Pa e concepto aki tin mas cu suficiente ehempel for di tur parti di mundo. E bukinan ‘Bon gobernashon & e realidad politico’ y ’25 jaar Status Aparte. Een politiek paradijs’ ta mustra bon cla con a duna contenido na politica na Aruba.

Asina mes politica tin un atracshon tambe pa hende hoben cu ideal mientras cu pa motibo di politica na varios pais cambio positivo tambe a tuma lugar. Esey no por ta otro pasobra al fin y al cabo politica ta e manera cu varios grupo of individuo den un comunidad por realisa nan interes y ideal. Mayoria di biaha esey ta tuma lugar a base di negociashon entre e diferente partidonan.

Den historia di humanidad politica a hunga un papel importante. Frecuentemente tawata trata di aumenta e interesnan di un monarca y su famia a costo di e poblashon. Pero grupo aparentemente debil of atrasa tambe a logra nan derechonan pa medio di negociashon. Un di e miho ehempelnan ta e lucha cu Nelson Manela a hiba na Sur-Africa. Den e articulo ‘Nelson Manela, van terrorist tot architect van een natie’, ta duna un bista chikito di e lucha aki.

Den historia di humanidad, soberano absoluto a comete hopi inhusticia. No solamente dictador, pero tambe lider elegi pa pueblo a duna nan mes e derecho pa dicidi riba tur cos y tur hende. Te dia di awe un grupo creciente di pais ta considera e sistema politico di democracia parlamentario e miho medio pa cumpli cu deseo y interes di e mayoria di un pais. Naturalmente e pregunta ta si en berdad democracia (ainda) ta e mihor sistema y si ta asina, si e ta funcshona debidamente y na ki manera por mehor’e den caso cu ta necesario.